वरिष्ठ बालसाहित्यकार शान्तदास मानन्धरया लुमंतिइ जुया वयाच्वंगु येँ महानगरब्यापी अन्तरस्कुल च्वखँ व चिनाखँ धेंधेंबल्लाया स्वक्वःगु संस्करण न्ह्यागु दु । येँ महानगरपालिका २३ वडाया ग्वसालय् जुयावयाच्वंगु धेंधेंबल्लाया झ्वलय् वंगु शुक्रवाः च्वखँ च्वयेगु ज्या जूगु खः । बालसाहित्यकार शान्तदास मानन्धर नेपाःया बालसाहित्य ख्यःया ज्वःमदुम्ह स्रस्ता खः । बालकोसेली, मचा क्यब थेंज्याःगु मचा पत्रिका पिथनादीम्ह वय्कलं थःगु जीवंकाःछि बालसाहित्य ख्यलय् मदिक्क ज्या यानादीगु दु । समाजसेवा, शिक्षा ख्यलय् नं तःजिगु योगदान बियादीम्ह वयकः येँ महानगरपालिका २३ वडाया पुलांम्ह नायः नं खः । वय्कःया लुमंतिइ येँ मनपा २३ वडापाखें थीथी ज्याझ्वः याना वयाच्वंगु दु । थ्व झ्वलय् २३ वडाया ग्वसालय् वंगु निदँ न्ह्यवनिसें शान्तदास स्मृति च्वखँ व चिनाखँ धेंधेंबल्ला जुया वयाच्वंगु। येँ महानगरपालिका दुनेया सामुदायिक व संस्थागत स्कुलय् ब्वनीपिं खुगू निसें गुंगू तगिं तकया ब्वनामि मस्तय्सं ब्वति कायेदइगु धेंधेंबल्लाःया स्वंगूगु संस्करणया ज्याझ्वः वंगु शुक्वाः निसें न्ह्याःगु खः । वंगु शुक्रवाः धेंधेंबल्लाखय् ब्वति काःपिं मस्तय्त च्वखँ च्वकेगु ज्या याःगु खः । च्वखँपाखे खुगू व न्हय्गू तगिंयापिंत खस नेपाली भासं व च्यागू व गुंगू तगिंयापिंत नेपालभाषां च्वखँ च्वके बिउगु खः । थुगुसी नपालभाषा पाखे मांभाय्या महत्व वा नेपाःया जनजाति विषयय् च्वखँ च्वके बिउगु खःसा खस नेपालीभाषाय् इन्द्रजात्रा वा मातृभाषाको महत्वविषयय् च्वके बिउगु खः । येँ मनपा २३ वडास्थित बालसेवा स्कुलय् जूगु धेंधेंबल्लाखय् १९ गू स्कुलया नेपालभाषा पाखे १९ म्ह व खस नेपालीपाखे ३७ म्ह यानाः ५६ म्हेसिनं ब्वति काःगु दु । चिनाखँपाखे खुगू व न्हय्गू तगिंयापिंत नेपालभाषा व च्यागू व गुंगू तगिंयापिंत खस नेपाली भासं च्वकेबिउगु खः । चिनाखँ विधाय् विषय मबिसे खुल्ला च्वकेबिउगु खः । चिनाखँ स्कुलय् हे च्वयाः बुझे जक याःसा गाःगु व्यवस्था याःगु खः । येँ मनपा २३ वडाया दुजः भाजु सुरेश मानन्धरं आः दुहांवःगु चिनाखँ व च्वखँया क्ववालेज्या जुयाच्वंगु व वइगु शुक्रवाः २२ गते सिरपाः लिच्वः पितबियाः सिरपाः लःल्हाइगु खँ कनादीगु दु । धेंधेंबल्लाखय् न्हाप, लिउ, लियांलिउ व हःपाः लाःपिंत नगद सिरपाः व दसिपौ लःल्हाइगु खँ नं वय्कलं कनादिल ।
