यल नेवाः समाजया ग्वसालय् निन्हुयंकं जूगु ‘यल नेवाः महोत्सव–११४६’ जूगु दु । पर्यटन प्रवद्र्धन यायेगु ताः तयाः ग्वसाः ग्वःगु महोत्सव यल महानगरपालिका १६ वडाया ग्वाहालिइ वंगु शुक्रवाः व शनिवाः निन्हुयंकं जूगु खः । यल महानगरपालिका १६ वडापाखें स्थानीय थाय्या विकासया ज्या लिसें नेपालभाषा, नेवाः संस्कृतिया विकास, संरक्षणया लिसें थीथी ज्या याना वयाच्वंगु दु । थ्व हे झ्वलय् यल मनपा १५ वडाया ग्वाहालिइ निन्हुयंकंया यल नेवाः महोत्सव जुल । यलया पर्यटन प्रवद्र्धन यायेगु उद्देश्य तयाः जूगु ज्याझ्वलय् बागमति प्रदेशस्तरय् नेपालभाषा छ्यलाबुला सम्बन्धय् नं सहलह जूगु खः । यल नेवाः समाजं ग्वसाः ग्वःगु महोत्सवया न्हापांगु न्हि शुक्रवाःकुन्हु परम्परागत सांस्कृतिक बाजंसहित मंगः बजारय् मुनाः यल देय् चाःहिउगु खः । नेवाः समुदायया मौलिक व परम्परागत पेशा, कला, संस्कार, संस्कृति पिज्वइगु स्टललिसें नसा ज्वलं, हस्तकला, धार्मिक व सांस्कृतिक ज्वलं, थीथी समुदायया परम्परागत सीप, पेशा महोत्सवय् न्ह्यब्वःगु खः । महोत्सवय् थीथी जातीय व धार्मिक संघसंस्थापाखें नं थीथी ज्वलंया ब्वज्या याःगु खः । महोत्सवय् बौद्ध विहार संघ, ताम्रकार समाज, नेमकुल समाज, नकःमि समाज, स्यस्यः समाज, चित्रकार (पुं) समाज, बाराहि समाज, राजकर्णिकार समाज, सिँकःमि समाज, राजोपाध्याय समाज, शिल्पकार समाज लगायत यल देय्या थीथी नीछगू जातीय समाजपाखें थःथःगु जातीय म्हसीका पिज्वइगु थीथी हलंज्वलंया ब्वज्या याःगु खः । महोत्सवया उलेज्या यासें यल महानगरपालिका १६ वडाअध्यक्ष निर्मलरत्न शाक्यं थुकथंया महोत्सवं नेवाः समुदायया एकता, सामूहिकता व सहकार्यया भावनां कला, संस्कृति संरक्षण व संवद्र्धनय् योगदान बीगु विश्वास प्वंकादिल । समाजया नायः नानीकाजी शाक्यं यल देय् दुनेया नीछगू जातीय समाज, खलः, पुचःयात छप्पँ यानाः नीस्वनागु यल नेवाः समाजं समन्वय, सहकार्य व मंकाः धइगु भावनायात कःघानाः थीथी ज्याझ्वः याना वयाच्वनागु जानकारी बियादिल । समाजया मूछ्याञ्जे संजय शर्मा राजोपाध्यायं स्थानीय तहं बजेट व नीति तथा कार्यक्रमय् यलया दक्वं जातीय समाजयात अनिवार्य रुपं प्रतिनिधित्व याकेमाःगु खँय् बः बियादिल । महोत्सवया निन्हुया दिं बागमति प्रदेशय् नेपालभाषा छ्यलाबुला सम्बन्धी सहलह ज्याझ्वः जूगु खः । उगु सहलह ज्याझ्वलय् नेवाः देय् दबूया मूछ्याञ्जे श्रीकृष्ण महर्जन व नेपालभाषा मंकाः खलःया पुलांम्ह नायःलिसें गुथि संस्थानया पूर्व प्रमुख प्रशासक किरण शाक्यं ज्यापौ न्ह्यब्वयादीगु खः । निन्हुया दिं सनिलय् लोकंह्वाःपिं न्हूपिं, पुलांपिं कलाकारतय्सं सांगीतिक व सांस्कृतिक ज्याझ्वः नं न्ह्यब्वःगु खः ।
