सामाजिक सेवा यायेगु लिसें त्वाःया संस्कृति, सम्पदा संरक्षण यायेगु ताः तयाः बागू दशक स्वयां न्ह्यः स्थापना जूगु ओलम्पस क्लबया बुन्हि हंगु दु । क्लबया स्थापनाकालं निसें ग्वाहालि याना वयाच्वनादीपिंत हनेज्या यासें क्लबया न्यय्च्याक्वःगु बुन्हि हंगु खः । येँ महानगरपालिका २३ वडा ओमबहालय् च्वंगु ओलम्पस क्लब नीस्वंगु न्यय्च्यादँ क्यंगु दु । स्थापना कालं निसें स्वास्थ्य सेवा, भाषा प्रवद्र्धन, समाजसेवाय् ज्या याना वयाच्वंगु क्लबया नीच्यादँ बुन्हि वंगु शुक्रवाः छगू ज्याझ्वः यासें तःजिक हन । थ्व झ्वलय् क्लबया स्थापना कालं निसें दुजः जुयाः ज्या यानादीपिं मुनेगु व हनेगु ज्याझ्वः नं जूगु खः । ज्याझ्वलय् क्लब नीस्वंगु इलंनिसें थौंया अवस्थातक्क थ्यंकेत थीथी कथं ग्वाहालि यानावया च्वंपिं स्वास्थ्यकर्मी, क्लबया क्लिनिकया ल्याब टेक्निसियन, समाजसेवी, बुद्धिजिवि, थीथी दँया हिदान ज्याझ्वःया संयोजकपिं, सञ्चारकर्मी, थीथी मिडिया, स्वास्थ्य स्वयम्सेविकापिंत क्लबया अध्यक्ष पबित्र बज्राचार्य, वडा अध्यक्ष मचाराजा महर्जन व न्वकू ज्योति शाक्यपिंसं लुमन्ति चिं लःल्हानादीगु खः । ज्याझ्वलय् क्लबया न्हापांगु ज्यासना पुचःया पदाधिकारीपिं म्हसीकेगु ज्या नं जूगु खः । ज्याझ्वलय् न्ववानादिसें क्लबया नायः पवित्र बज्राचार्यं क्लबया म्हसिका नापं थौंतक्क यानावःगु गतिबिधिया बारे दुग्यंक खँ कनादीगु खः । नुगः खँ तयेगु झ्वलय् नायः बज्राचार्यं ओमबहाः त्वाः गद्यगुरु निष्ठानन्द वज्राचार्य, सिद्धिचरण श्रेष्ठ, पन्नाकाजि शाक्य थेंज्याःपिं स्रस्तापिनि त्वाः जूगु खँ कनादिसें थ्व थाय् पुस्तकालय, थीथी भाषिक, सामाजिक, दबू प्याखँ व प्याखँम्वत ब्वलंगु छगू नमूना त्वाः जूगु खँ लुमंकादीगु खः । बुन्हि हनेगु झ्वलय् सच्छि व नीन्याम्हेसित मतिनाया चिं लःल्हाःगु खः । वरिष्ठ म्ये हालामि प्रवेश मान शाक्यं लोकंह्वाःगु म्ये न्यंकाः ज्याझ्वःयात झःझः धायेका बिउगु खः ।
