काठमाडौं महानगरपालिका २३ वडाले स्थानीय प्रतिभा प्रदर्शन गर्न साप्ताहिक सांस्कृतिक कार्यक्रमहरू सञ्चालन गर्दै आइरहेको छ । सात हप्ताको कार्यक्रम पछि आइतबार साप्ताहिक सांस्कृतिक कार्यक्रमको समापन गरिएको छ। काठमाडौं उपत्यकाका युवा पुस्तामा सांस्कृतिक चेतना आउँदैछ । यस सांस्कृतिक जागरणको क्रममा, युवा पुस्ताले परम्परागत वाद्यवादन र संगीतलाई नयाँ तरिकाले अगाडि बढाइरहेको छ । यसका साथै युवा पुस्ताले परम्परागत लोकनाच र लोकसंगीत सिकिरहेका छन् । युवापुस्ताले सिकिरहेको संगीत र नृत्य प्रदर्शन गर्ने प्लेटफर्मको अभावलाई ध्यानमा राख्दै, काठमाडौं महानगरपालिकाको २३ वडाले गएको सात हप्ता अगाडिदेखि हरेक हप्ता सांस्कृतिक कार्यक्रमहरू आयोजना गरेको थियो ।
कार्यक्रममा २३ वडाभित्रका १०० भन्दा बढी युवा पुस्ताले आफ्नो प्रतिभा प्रस्तुत गरेका थिए भने यहाँका युवाहरुको सांगीतिक समूह सुरभिषाले पनि प्रस्तुति दिएका थिए । सांस्कृतिक कार्यक्रमको क्रममा २३ वडाका स्थानीयहरूले तयार पारेका हस्तकला तथा घरेलु उत्पादनहरूको विक्री वितरणको लागि स्टलहरु राखिएको थियो । त्यस्तै कार्यक्रममा नेवाः परम्परागत परिकार स्टलहरू पनि राखिएको थियो । युवा पुस्तालाई आफ्नो प्रतिभा प्रदर्शन गर्न आयोजना गरिएको साप्ताहिक सांस्कृतिक कार्यक्रमको समापन आइतबार बसन्तपुरमा गरिएको थियो ।
समापन कार्यक्रममा पनि २३ वडाका स्थानीय बासिन्दाहरूले तयार पारेका विभिन्न घरायसी उत्पादन, हस्तकलाका सामान तथा नेपाली खानाका स्टलहरू राखिएको थिए । कार्यक्रममा सुरभिषालगायत २३ वडाका कलाकारहरूले चर्या नाच र लोकनाच प्रस्तुत गरेका थिए । कामपा २३ वडाका अध्यक्ष मचाराजा महर्जनले यहि जेठ २३ गते राष्ट्रिय सभागृहमा आयोजना हुने विशेष समारोहमा सहभागीहरू सबैलाई प्रमाणपत्र र प्रशंसापत्र प्रदान गरिने बताउनु भएको छ ।
